“عبدت ربنا ولا معبدتش؟”

الله سبحانه وتعالى بيقول: ( وَمَا خَلَقْتُ الْجِنَّ وَالإنْسَ إِلا لِيَعْبُدُونِ ) يبقى اي حاجه تشغلك عن ربنا أعمل حسابك انه إبليس والشيطان..

مش عايز فلسفة، اتفلسف زي ماانت عايز (وَكَانَ الْإِنسَانُ أَكْثَرَ شَيْءٍ جَدَلًا)، إنما عند ربنا يوم القيامة هيسألك هذا السؤال .. هيقولك ما خلقتك إلا لتعبدني وانا تكفلت لك بالرزق و تكفلت لك بكل حاجه ولما يحين أجلك هموتك ومش هموتك بمرض هموتك لأن أنفاسك أنتهت، ورزقك أنتهى ، و درجتك أنتهت .. المرض سبب زيه زي غيره

أول سؤال هتُسأل عنه يوم القيامة ولما تطلع روحك “عبدت ربنا ولا معبدتش؟” . أولا ربنا وبعدين دبر حياتك من خلال ربنا سبحانه وتعالى، من خلال رضاه ، من خلال أوامره ، من خلال شرعه

الأولوية لمين؟ لله سبحانه وتعالى مافيهاش كلام .. إللى مخه هيودي ويجيب ويقول لي أصل مش عارف مين قال والحديث بيقول ولا الشيخ بيقول..أنا بقولكم وانتم مسئولين عن الكلام اللى أنا بقوله  وقد بلغت فاللهم اشهد .. أولا ربنا سبحانه وتعالى إجعل كل عملك وكل تصرفاتك وكل همك وكل أملك وكل شغلك بالله سبحانه وتعالى أولا ومن خلال ربنا اسعى في حياتك واعمل اللى انت عاوزه، من خلال رضا ربنا، من خلال شرع ربنا و من خلال أوامر ربنا ومن خلال نوايا ربنا غير كدا ميضحكش عليك الشيطان يبقى مدخل من مداخل إبليس .. ماشي؟

الرزاق هو الله ، والشافي هو الله ، والمعين هو الله ، والقوي هو الله ، والفعال لما يريد هو الله ، و القاهر فوق عباده هو الله ، والعدل هو الله ، والحق هو الله ,, يبقى إبليس ميضحكش علينا.

مقتطف من حديث “التوحيد وآداب السلوك” – لعبد اللـه // صلاح الدين القوصى

www.alabd.com

www.attention.fm

شارك الموضوع بالضغط علي الزر أدناه
Tweet about this on Twitter
Twitter